على قدر قـدرك تساق الفناجيل
وعلى قدر عـزك تجيك التحايـا
والوقت يكشف لك وجيه الرجاجيل
وبعض الوجيه تبين فيهـا النوايـا
والتجربه احيان لو هـدت الحيـل
اخيـر مـن جهـلٍ بكـل الخفايـا
رجلٍ على ماقيل يستاهل الهيل
محشوم خلقه من جزيـل العطايـا
منزهٍ نفسه عن القـال والقيل
وله سيرةٍ عطره وطيـب سجايا
له قيمةٍ بين الرجال المشاكيل
ولا داج حـول المهزلـه والدنايـا
ذكره مابين الناس عالي كما سهيل
مكمله ربـي بـكل المزايـا
ورجل على ماقيل ضمن المهابيل
وزودٍ على هبالـه كثيـر الخطايـا
ماله مع اهل الطيب قدرٍ ولا كيـل
وبضاعته بيـن العـرب بالحكايـا
يهب ياوجهٍ سـواده كمـا الليـل
يهـب ياوجـه الـردى والوشايـا
وانا منايه كل ماسرجت لي خيل
ان الاوادم تتعـض بالوصـايـا
خلك وفي مع الرجال الحلاحيل
ترى الوفاء تـاجٍ بـروس البرايـا
وابعد عن اهل الكذب والقول والميل
لاتغرك الضحكه وبيـض الثنايـا
هذا الزمن فاني وجيل ورى جيـل
والطيب يبقى بعـد سهـم المنايـا
اللي بغاهـا قدمـه البـن والهيـل
ومن لابغـا قدمـه بحـورٍ ملايـا