في منطقتنا شف وش اللي صاير
ـــــــــــــــــــــــــــــ بدوٍ غلابا يشتكون الفاقه
يشكون من جور الزمان الجاير
ـــــــــــــــــــــــــــــــ الي سلبهم نفطهم والطاقه
لكنّهم مثل البليد الحاير
ــــــــــــــــــــــــــــــ الي مضيّع منهجه واوراقه
يوم امتحانه صار دمّه فاير
ــــــــــــــــــــــــــــــ ماهمّه الا حسرته واخفاقه
لكن من شدّة غباءه داير
ــــــــــــــــــــــــــــــ يبغا الظهور بصورةٍ براقه
اكبر دليل انا نحب نساير
ـــــــــــــــــــــــــــــ صيحات الاعلام الغبي ونفاقه
ندعي لحفلات البهايم زاير
ـــــــــــــــــــــــــــــ ونتبع هوى راعي الهوى ونياقه
كم واحدٍ خلف المزاين باير
ـــــــــــــــــــــــــــــ عاطل وزاده مبطيٍ ماذاقه
من شدة اعجابه غباره ثاير
ـــــــــــــــــــــــــــــ معمي عبادالله ومتعب ساقه
في منظرٍ يستوقف اسرع طاير
ـــــــــــــــــــــــــــــ خمسين (واحد) يتبعون الناقه
::::::::::::::::::::::::::::::::::::::
سعد العدواني - اهداء الى هواة المزايين من بهيمة الانعام