[العرنين]

السلام عليكم ورحمة الله وبركاته
..
اتمنى ان يسعفني ما بقي في راسي لاكمل هذا الموضوع
الوقت الساعه 11 صباحا
المكان احدى الدوائر الحكوميه
المدينه الرياض
..
دخلت على الموظف المشغول جدا جدا جدا والمنهمك الى اخمص اذنيه في تصفح الصفحات الرياضيه
لجريدة الرياض
وبعد السلام اللي ما رد عليه ، وبعد نظره تفحص رمقني بها خلتني ابلع ريقي من الرعب
ناولته ورقه تخص معاملتي المبجله
رد علي بكل برود ، معاملتك خلاص خلصتها من عندي وارسلتها بالبريد للاداره
قلت وش لون وانا اخوك انا توي جاي من الاداره وقالوا المعامله المفروض توصلهم من امس
وانت تقول انك ارسلتها ، والبريد لو ترسلها على بعير وصلت ما بالك ان الاداره في نفس المدينه
وما بينكم الا ثلاث اشارات
قال انا خلصتها من عندي وارسلتها رح راجع الاداره
...
طلعت من عنده وانا اردد لاحول ولا قوة الا بالله
قلت في نفسي دامني وصلت هنا خلني امر الصادر واستفسر متى طلعت المعامله
وبالمره اخذ رقم صادرها نراجع فيه الاداره
مريت الصادر وما قصر الموظف استفسر لي بالجهاز وكانت المفاجأه
يا اخوي ما في شي باسمك !!!!!
من قال لك ان المعامله صدرت ؟؟؟
علمته عن الموظف اللي قال لي الكلام
ومره ثانيه تفضل على الموظف وطلع جواله واتصل على الموظف الاول
قال ارسله علي ، خله يجيني الحين
رجعت لخويي الاول ولقيته حط الجريده على الصفحه الرياضيه لجريدة الجزيره هالمره
وتركها مفروشه على الطاوله وهو واقف عند جهاز كمبيوتر
قال لي اول ما شافني تصدق توي مشيت معامله تشبه معاملتك ولواحد اسمه مثل اسمك
واختلط علي الامر ، تخيلوا هذا التشابه الدقيق مع ان المعامله اتحدى ان تشبه معامله اخرى

قلت له ما يخالف ، اشوى اني ما رجعت الادراه مره ثانيه
وبعد ما اخذت معاملتي بيدي ، حلفت ما يخلصها غيري لو اقعد اراجع سنه
....
ودي اعرف لو ما راجعت ورى المعامله كم بتبقى في جهاز الاخ موظف
ويا خوفي لا يغيرون الجهاز وتروح المعامله من ضمن التالف
...

دمتم جميعا في خير